Babək rayonunun Xalxal sahəsində faydalı qazıntıların axtarış-qiymətləndirmə işləri aparılır

Babək rayonunun Xalxal sahəsində faydalı qazıntıların axtarış-qiymətləndirmə işləri aparılır

“Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”na uyğun olaraq Babək rayonunun Xalxal sahəsində qara, əlvan və nəcib metallara axtarış-qiymətləndirmə işləri davam etdirilir.

Naxçıvan şəhərindən 18 kilometr şimal-qərbdə, Naxçıvançayın orta axım hövzəsində yerləşən Xalxal sərbəst mis təzahürü 1963-cü ildə aşkar olunub. Ərazidə 1970–1980-ci illərdə ilkin axtarış işləri aparılıb.

Hazırda 12,8 kvadratkilometr ərazidə 1:25 000 miqyaslı axtarış işləri həyata keçirilib, marşrutlar keçilib, geofiziki tədqiqatlar aparılıb, həmçinin yerüstü dağ qazmalarının – şurf və xəndəklərin fiziki həcmləri müəyyənləşdirilib.

Filizləşmənin dərinlikdə öyrənilməsi, yerin təkindəki mineral ehtiyatların tərkibinin müəyyənləşdirilməsi və sahənin perspektivliyinin qiymətləndirilməsi məqsədilə hazırda buruq-qazma işləri davam etdirilir.

Çöl işləri başa çatdıqdan sonra əldə olunan nəticələr əsasında geoloji hesabat hazırlanacaq.