“Ekoloji təhsil” layihəsi çərçivəsində növbəti təlim Culfa rayonunda təşkil olunub

“Ekoloji təhsil” layihəsi çərçivəsində Culfa rayonunun Teyvaz, Ərəfsə və Milax kənd məktəblərinin şagirdləri Milax kənd tam orta məktəbində bir araya gəliblər. Təlim zamanı məktəblilərə tullantıların düzgün idarə olunması barədə ətraflı məlumat verilib.

Nazirliyin əməkdaşı Elsanə Qurbanlı və Dövlət Ekoloji Təhlükəsizlik Xidmətinin əməkdaşı Azər Vəliyev şagirdlərlə söhbətlər apararaq tullantıların düzgün idarə olunması və təbii ehtiyatların qənaətlə istifadə edilməsinin vacibliyindən danışıblar.

Qeyd olunub ki, məişət tullantılarının çeşidlənməsi, təkrar emal vərdişlərinin formalaşdırılması və plastik tullantıların azaldılması ekoloji tarazlığın qorunmasına mühüm töhfə verir.

Şagirdlərə tullantıların təbiətə atılmasının torpağı, suyu və havanı çirkləndirdiyi, bunun isə ekoloji tarazlığa mənfi təsir göstərdiyi izah olunub.

Bildirilib ki, tullantıların düzgün idarə olunması təkcə ətraf mühitin deyil, həm də insan sağlamlığının qorunması baxımından vacibdir.

Təlimin sonunda şagirdlərin mövzu ətrafındakı fikirləri dinlənilib və sualları cavablandırılıb.