Cəlilov Həsən Məhərrəm oğlu 30 mart 1995-ci ildə Şərur rayonunun Qarahəsənli kəndində anadan olub.

Tam orta təhsilini Qarahəsənli kənd tam orta məktəbində alan Həsən 2013-2015-ci illərdə həqiqi hərbi xidmətdə olmuşdur. 2019-cu ildə müddətdən artıq həqiqi xidmət qulluqçusu olaraq orduda xidmətə başlamışdır. Azərbaycan Ordusunun Xüsusi Təyinatlısı Cəlilov Həsən 2020-ci il sentyabrın 27-də Azərbaycan Respublikası Silahlı Qüvvələri tərəfindən erməni işğalı altında olan torpaqlarımızın azad edilməsi və Azərbaycan Respublikasının ərazi bütövlüyünün bərpa olunması üçün başlanan Vətən Müharibəsi zamanı Xocavənd rayonunun azadlığı uğrunda gedən döyüşlərdə iştirak edərək Cəlilov Həsən  28 oktyabr 2020-ci ildə qəhramancasına şəhid olmuşdur.

Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti, Müzəffər Ali baş Komandan  İlham Əliyevin müvafiq Sərəncamları ilə Cəlilov Həsən ölümündən sonra “Vətən uğrunda”, “Xocavəndin azad olunmasına görə”, “İgidliyə görə”, “Şuşanın azad olunmasına görə” medalları ilə təltif edilmişdir.

Şəhid Həsən Cəlilovun nəşi Şərur rayon Qarahəsənli kənd qəbiristanlığında dəfn olunmuşdur.