“Ekoloji Təhsil” layihəsi çərçivəsində Ordubad rayonunda maarifləndirici tədbir keçirilib

Naxçıvan Muxtar Respublikası Ekologiya və Təbii Sərvətlər Nazirliyi və Təhsil Nazirliyinin birgə təşkilatçılığı ilə “Ekoloji Təhsil” layihəsi çərçivəsində Ordubad rayonunun Nüsnüs kənd tam orta məktəbində maarifləndirici tədbir keçirilib.
Tədbirdə şagirdlərə ekoloji biliklər, ətraf mühitin mühafizəsi, təbii sərvətlərdən səmərəli istifadə və yaşıllıqların qorunmasının əhəmiyyəti barədə məlumat verilib. Mövzular ətrafında müzakirələr aparılıb, şagirdlərin sualları cavablandırılıb. Məktəblilər mövzuya böyük maraq göstərib, fəallıqları və müzakirələrdə iştirakı ilə seçiliblər. Eyni zamanda, onlar təbiətin gözəlliyini əks etdirən rəsmlər çəkərək yaradıcılıq bacarıqlarını nümayiş etdiriblər.
Sonda şagirdlər məktəbin həyətində ağaclar əkərək yaşıllıqların əhəmiyyəti və onların artırılmasının vacibliyi ilə bağlı əldə etdikləri bilikləri praktik fəaliyyətlə möhkəmləndiriblər.
Xatırladaq ki, layihənin əsas məqsədi şagirdlərin ekoloji biliklərini artırmaq, onlarda təbiətə qayğıkeş münasibət formalaşdırmaq və ətraf mühitin mühafizəsində fəal iştiraklarını təşviq etməkdir.