Cabbarov Seymur İlham oğlu 1987-ci il mart ayının 16-da, Şərur rayonunun Çərçiboğan kəndində anadan olub.

İlk təhsilini Çərçiboğan kənd tam orta məktəbində alan Seymur 2001-2004-cü illərdə Cəmşid Naxçıvanski adına Hərbi liseydə təhsilini davam etdirmişdir. 2004-2008-ci illərdə Heydər Əliyev adına Azərbaycan Ali Hərbi Məktəbində ali hərbi təhsilə yiyələnmişdir. Azərbaycan Ordusunun kapitanı olan Cabbarov Seymur 2020-ci il sentyabrın 27-də Azərbaycan Respublikası Silahlı Qüvvələri tərəfindən erməni işğalı altında olan torpaqlarımızın azad edilməsi və Azərbaycan Respublikasının ərazi bütövlüyünün bərpa olunması üçün başlanan Vətən Müharibəsi zamanı Füzuli rayonunun azadlığı uğrunda gedən döyüşlərdə yaralanmış, oktyabrın 3-də qəhramancasına şəhid olmuşdur.

Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti, Müzəffər Ali baş Komandan  İlham Əliyevin müvafiq Sərəncamları ilə Cabbarov Seymur “Azərbaycan Silahlı Qüvvələrinin 95 illiyi yubley medalı və “Qüsursuz Xidmətə görə 3-cü dərəcəli” medalları sağlığında ölümündən sonra 3-cü dərəcəli “Rəşadət” ordeni, “Vətən uğrunda”, “İgidliyə görə”, “Füzulinin azad olunmasına görə” medalları ilə təltif edilmişdir.

Şəhid kapitan Cabbarov Seymurun nəşi Şərur şəhər Şəhidlər Xiyabanında dəfn olunmuşdur.

Şəhidimizin vətənə əmanət 2 övladı vardır.