Əliyev Ənvər Nizami 1997-ci il iyunun 4-də Şərur rayonunun Axaməd kəndində anadan olub.

İlk təhsilini 2003-2012-ci illərdə Şərur rayon Axaməd kənd tam orta məktəbində sonra 2012-2015-ci illərdə Heydər Əliyev adına Hərbi Liseydə, 2015-2016-cı illərdə Türkiyədə Quru Qoşunlarının Hərbi Məktəbində və 2016-2020-ci illərdə isə Heydər Əliyev adına Azərbaycan Ali Hərbi Məktəbində mühəndis-istehkamçı ixtisasına yiyələnmişdir.

Azərbaycan Ordusunun leytenantı olan Ənvər Əliyev 2020-ci il sentyabrın 27-də Azərbaycan Respublikası Silahlı Qüvvələri tərəfindən erməni işğalı altında olan torpaqlarımızın azad edilməsi və Azərbaycan Respublikasının ərazi bütövlüyünün bərpa olunması üçün başlanan Vətən Müharibəsi zamanı Tərtər rayonunun Suqovuşan qəsəbəsinin azadlığı uğrunda gedən döyüşlərdə iştirak edərək oktyabrın 15-də qəhramancasına şəhid olmuşdur.

Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti, Müzəffər Ali baş Komandan  İlham Əliyevin müvafiq Sərəncamları ilə Ənvər Əliyev ölümündən sonra 3-cü dərəcəli "Vətənə xidmətə görə" ordeni "Vətən uğrunda",“ İgidliyə görə” ,"Suqovuşanın azad olunmasına görə" medalları ilə təltif edilmişdir.

Şəhid Leytenant  Əliyev Ənvər Nizami  oğlunun nəşi Şərur şəhər Şəhidlər Xiyabanında dəfn olunmuşdur.