Şəhid Əliyev Nəcəf Əli oğlu 1977-ci il noyabrın 7-də Şərur şəhərində anadan olmuşdur. Əliyev Nəcəf, 1984-cü ildə Şərur Şəhər 2 nömrəli tam orta məktəbinin 1-ci sinifinə daxil olmuşdur. Əliyev Nəcəf, məktəbdə oxuduğu müddətdə şagirdlər arasında yaxşı mənada seçilən şagirdlərdən biri oldu. Nəcəf nizam-intizamlı, çalışqan dərslərini yaxşı oxuyan bir şagird idi. Xüsusəndə tarix fənnini çox yaxşı mənimsəyib oxuyurdu. Nəcəf, həm idmanla, həmdə musiqi ilə məşğul olurdu. Nəcəfin güləş üzrə idman dərsləri olurdu və idman yarışlarında birincilik qazanırdı. Musiqidən məşğul olduğu alət saz aləti idi. Nəcəf məktəbdaxili keçirilən tədbirlərdə çaldığı sazla tədbirdə olanları feyziyab edirdi. Onun vətənə və vətən uğrunda canından keçən şəhidlərə böyük sevgisi var idi. 1992-ci il oktyabr 13-də məktəbdən evə gələrkən yolda erməni terrorçularının atdığı top mərmilərinin yaralaması nəticəsində şəhidlik zirvəsinə ucaldı. O, şəhid olduğu zaman 10-cu sinifdə oxuyurdu.

Əliyev Nəcəfin nəşi Şərur şəhər Şəhidlər Xiyabanında dəfn olunub.