İbrahimli Elçin Sadiq oğlu 1997-ci il sentyabr ayının 26-da Şərur rayon Yengicə kəndində anadan olmuşdur. Elçin İbrahimli ilk təhsilini Şərur rayonu Yengicə kənd tam orta məktəbində  almışdır. 2012-2015-ci illərdə Heydər Əliyev adına Hərbi liseydə təhsilini davam etdirmişdir. 2015-2019-cu illərdə Heydər Əliyev adına Azərbaycan Ali Hərbi Məktəbində mühəndis-istehkamçı ixtisasına yiyələnmişdir. Azərbaycan Respublikası Silahlı Qüvvələrinin hərbi qulluqçusu Elçin İbrahimli 44 günlük Vətən Müharibəsində, 2022-ci ilin sentyabrda “Qisas” əməliyyatında iştirak etmiş, “Suqovuşanın azad olunmasına görə”, “Vətən müharibəsi iştirakçısı” medalları ilə təltif edilmişdir.

Elçin İbrahimli  Azərbaycan Respublikasının Silahlı Qüvvələri tərəfindən 19 sentyabr 2023-cü il tarixində həyata keçirilmiş uğurlu lokal anti-terror tədbirləri zamanı Ağdərə istiqamətində gedən döyüşlərdə qəhrəmancasına şəhid olmuşdur.

Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu Elçin İbrahimli Azərbaycan Respublikasının Prezidenti İlham Əliyevin Sərəncamına əsasən "Vətən uğrunda” medalı və  3-cü dərəcəli “Vətənə xidmətə görə” ordeni ilə təltif edilmişdir. 

Ailəlidir. Şəhid Baş Leytenant İbrahimli Elçin Sadiq oğlunun nəşi Şərur şəhər Şəhidlər Xiyabanında dəfn olunmuşdur.