Məmmədov Ayxan Rəfail oğlu 1998-ci il sentyabrın 14-də Şərur rayonunun Xanlıqlar kəndində anadan olub. 

İlk təhsilini Xanlıqlar kənd tam orta məktəbində alan Ayxan 2013-2016-cı illərdə Heydər Əliyev adına Hərbi liseydə təhsilini davam etdirmişdir. 2016-2020-ci illərdə Heydər Əliyev adına Azərbaycan Ali Hərbi Məktəbində ali hərbi təhsilə yiyələnmişdir. Azərbaycan Ordusunun leytenantı olan Məmmədov Ayxan Təhsilini bitirdikdən sonra Xüsusi Təyinatlı Qüvvələrin tərkibində xidmətini davam etdirmişdir. 2020-ci il sentyabrın 27-də Azərbaycan Respublikası Silahlı Qüvvələri tərəfindən erməni işğalı altında olan torpaqlarımızın azad edilməsi və Azərbaycan Respublikasının ərazi bütövlüyünün bərpa olunması üçün başlanan Vətən Müharibəsi zamanı Xocavənd rayonunun azadlığı uğrunda gedən döyüşlərdə iştirak edərək oktyabrın 21-də qəhramancasına şəhid olmuşdur.

Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti, Müzəffər Ali baş Komandan  İlham Əliyevin müvafiq Sərəncamları ilə Məmmədov Ayxan ölümündən sonra “Azərbaycan Bayrağı” ordeni, “Vətən uğrunda”, “Füzulinin azad olunmasına görə”, “Şücaətə görə”, “Xocavəndin azad olunmasına görə”, “Kəlbəcərin azad olunmasına görə” medalıları ilə təltif edilmişdir.

Şəhid Leytenant Məmmədov Ayxan Rəfail oğlunun nəşi Şərur rayon Xanlıqlar kənd qəbirstanlığında dəfn olunmuşdur.