Novruzov Nazim Vəli oğlu 1959-cu ildə yanvarın 10-da Şərur rayonunda anadan olub. Orta məktəbi Şərur rayonunda bitirdikdən sonra Bakı şəhərində fəhlə işləyib. Rusiyada hərbi xidməti başa vurduqdan sonra  Binəqədi rayon polis şöbəsində işləyib. 1990-cı ildə könüllü olaraq, vətən torpaqlarının müdafiəsinə gedib. Ağdam, Laçın, Kəlbəcər, Qubadlı, Zəngilan döyüş zonalarında erməni işğalçılarına ağır zərbələr endirib. Ağdam rayon Seyidlər kəndi uğrunda gedən döyüşlər zamanı erməni gülləsinə duş gəlir. 1994-cü il fevralın 6-da Nazim qəhrəmancasına şəhidlik zirvəsinə ucalır. O, son nəfəsində ana nəfəsinə, ata səsinə ehtiyacı olsa da heç birini görmədi, görüşə bilmədi. Çünki atası 1985-ci il oktyabrın 28-də, anası isə 1987-ci il fevralın 28-də dünyasını dəyişmişdi.

Novruzov Nazim Vəli oğlunun nəşi Bakı şəhər Şəhidlər Xiyabanında dəfn olunmuşdur.