Qəhrəmanov Niyazi Nurəli oğlu 1973-cü ilin  fevral ayının 5-də  Şərur rayon Püsyan kəndində anadan olub. 1979-cu ildə Məmməd Əsgərov adına Püsyan kənd orta məktəbinin I sinifinə daxil olub. 1989-cu ildə həmin məktəbin X sinifini bitirib. 1990-cı ilin dekabr ayında Azərbaycan Respublikasında daxil olduğu Sovet İttifaqının ordu sıralarına çağrılıb, xidmətini Kırım vilayətinin Feodasiya şəhərində 1992-ci ilin mart ayına qədər davam etdirib. Sovet İttifaqının dağılması səbəbilə geri qayıdıb və yeni qurulmuş Azərbaycan Respublikasının Naxçıvan Muxtar Respublikasında Milli Orduda xidmətini davam etdirib. Naxçıvan Muxtar Respublikasının ordu sıralarında müxtəlif hərbi hissələrdə xidmət edib. Sədərək döyüşlərində və müxtəlif qaynar nöqtələrdə döyüş yoldaşları ilə birgə iştirak edib. 1994-cü ildə tağım komandirinin müavini vəzifəsində olduğu dövrdə Culfa rayonunda yaradılmış zabitlər kursuna daxil olur və əlaçı qiymətlə oranı bitirir. Zabit rütbəsi verilməsi üçün sənədlər Müdafiə Nazirliyinə göndərilməsi dövründə Niyazi yenidən öz hərbi hissəsinə qayıdır.

1995-ci ilin yanvar ayının 29-da döyüş mövqeyini yoxlamaq məqsədilə PİM (piyadanın döyüş maşını) ilə ora gedirlər. Mövqeyi yoxlayıb geri qayıdarkən PİM idarəetmədən çıxır və dərəyə yuvarlanır. Ağır zədə alan Niyazi Naxçıvan şəhər hərbi hospitalına çatdırılsada həyatını xilas etmək mümkün olmur.

Şəhid Qəhrəmanov Niyazi Nurəli oğlunun nəşi 30 yanvar 1995-ci ildə Şərur rayon Püsyan kənd qəbirstanlığında dəfn olunmuşdur.