Şəhid Rəhimov Asəf Bayram oğlu 1960-cı ilin yanvar ayının 24-də Şərur rayonunun Düdəngə kəndində anadan olub. Düdəngə kəndində böyüyüb başa çatıb və orta məktəbi bitirdikdən sonra Ordu sıralarında xidmət etmişdir. Hərbi xidmətini başa vurduqdan sonra 1990-cı ildə Şərur rayon Polis şöbəsinin Post patrul xidməti rotasında polis nəfəri vəzifəsinə qəbul olunur. Onu hamı Əlibaba deyə çağırırdı. Əlibaba bir çox döyüşlərdə iştirak etmiş və mənfur düşmənlərə ağır zərbələr vurmuşdur. Düşmənlər Sədərəkdəki müdafiə qüvvələrimizi parçalamaq niyyəti ilə Günnüt kəndinə basqınlar edirdi. Onun son döyüşü 1992-ci ilin may ayının 13-də Günnüt kəndində oldu. O, döyüş yoldaşlarını mühasirədən çıxararaq düşmənlə təkbətək qalıb son gülləsinədək vuruşdu. Son gülləsini isə düşmənin əlinə keçməməsi üçün  özünə sıxdı. Asəf bununlada şəhidlik  zirvəsinə ucaldı. Ümummilli Liderimiz Heydər Əliyevin ermənistanın o zamankı prezidenti L.Ter-Petrosyanla apardıqları danışıqlardan sonra Qəhrəmanımızın cəsədi düşməndən alınaraq anadan olduğu Şərur rayonunun Düdəngə kənd qəbirstanlığında dəfn olundu. Ailəli idi, 2 övladı vətənə əmanət qalıb.

Azərbaycan Respublikasının Prezidentinin 30 iyun 2002-ci il tarixli 725 №-li fərmanı ilə ölümündən sonra "Azərbaycan bayrağı" ordeni ilə təltif olunmuşdur.